Mosketeak (eu)

Mosketaria tiroa egiten

Mosketea suzko arma izan zen, infanteriako gudariek erabilia XVI mendetik XIX mendera.

Arkabuzen bilakaera izanik, ahotik kargatzen zen, eta tiroa egiteko teknologia hobetuz joan zen: argi-mukia (edo metxa), errobera, suharria eta pistoia.

Jatorria

Mosketeak XVI. mendean agertu ziren, Alemaniako Dresden inguruan, arkabuzaren bilakaera moduan: handiagoak eta indartsuagoak.

Arkabuzek 50 bat metrotako irismen eraginkorra zuten, eta gehienetan 25 metrotara erabiltzen ziren. Arma arinak zirenez, malgutasun handia ahalbidetzen zien arkabuzariei gudu-zelaietan.

Mosketeak, berriz, handiagoak ziren: metro edo metro t’erdiko kainoiak zituzten. Honela irismen bikoitza lortzen zuten, eta jaurtigai astunagoak erabiltzen zituzten. Horregatik, hasiera batean gaztelu, gotorlekuak eta itsas-ontziak defendatzeko artilleria txikia moduan erabiltzen ziren:

• Galeratan erabiltzeko argi-mukizko mosketea. Kalibre 27 mm. Luzeerak 156 zm (kainoia) eta 230 zm (osoa). Pisua 23,69 kg.
• Harresietan erabiltzeko argi-mukizko mosketea. Kalibre 27 mm. Luzeerak 156 zm (kainoia) eta 196 zm (osoa). Pisua 24,31 kg.

Harresietan erabiltzeko mosketea (XVI. mendea)

1567 urtearen inguruan, Albako dukeak berarekin eraman zituen Italiatik Herbeheretara. Baina, handiak eta astunak zirenez, egurrezko kako baten gainean jarri behar ziren. Handik aurrera gudu zelaietan ere erabiltzen hasi ziren: eraso zein defentsan, pika-batailoiak erdiak jartzen zituzten eta bi hegaletan moskete eta arkabuz konpainiak.

Mugitzeko indar handia behar zen, eta ondo destatzeko, berriz, trebezia. Horregatik mosketariek arkabuzariek baino 3 ezkutu gehiago irabazten zuten.

Dena dela, astunagoak eta garestiagoak zirenez, mosketeek ez zituzten arkabuzak ordezkatu berandu arte: arkabuzak XVII. mende arte erabiltzen jarraitu ziren: diotenez, XVI. bukaeran Soraluze eta inguruko herrietan 12.000 bat arkabuz eta 3.000 moskete egiten ziren urtero.

Mosketea (1512)

Tiro egiteko sistema

Moskete guztiek tiro egiteko sistema berbera erabiltzen zuten, arkabuzek erabiltzen zutena.

Avancarga zirenez, kainoiko ahotik polbora gordinaren karga bat sartzen zen, ondo zapaldu gero eta, azkenik, jaurtigaia (gehienetan berunezko pilotak).

Kanioaren beste aldean almetxa zegoen. Bertan polbora mehea sartzen zen, eta ixten zen.

Almetxako polbora mehea piztu eta gero, lehertzen zen. Zulo txiki batez, belarria izenekoa, sugarra kainoi barrura pasatzen zen, bertako polbora pizten eta tiroa eraginez.

Gorago agertzen den moduan, lau teknologia erabili ziren: argi-mukia (edo metxa), errobera, suharria eta pistoia.

Mosketaria argi-mukia prestatzen

Mosketariak

Arkabuzak arinak izanik, arkabuzariak lehen lerroetan borrokatzen zuten, askotan kaskoaz eta bular-oskolaz babestuta. Mosketariak atzerago egoten zirenez, armen pisua zela eta, larruzko txaleko modukoa besterik ez zeramaten. Inoiz buruz buru borrokatu behar bazuten, ezpata eta sastagaia erabiltzen zuten, edota moskete bera mailu moduan.

Soinean gurutzatuta hamabi apostoluak eramaten zituzten; hau da, egurrezko hamabi tutu, bakoitza polbora gordinaren karga zehatz batekin

Soinean gurutzatuta ere, polbora meheaz betetako hauts-kaxa zeramaten, gero almetxan jartzeko. Eta alboko poltsatxo batean berunezko balak edo pilotak.

Mosketari famatuenak, duda barik, Alejandro Dumas-en Hiru Mosketariak eleberrikoak dira: Athos, Portos, Aramis eta D'Artagnan.

Argi-mukizko mosketea (XVII. mendea)

Teknologia

Aurreneko mosketeek arkabuzen sistema berbera erabiltzen zuten, argi-mukizko giltza hain zuzen.

Behin polbora mehea almetxan sartuta, mosketariak serpentinan lotuta zegoen argi-mukia pizten zuen (aurretik piztuta ez balego). Palanka edo katua zapaltzerakoan, piztutako argi-mukiak almetxa jotzen zuen. Orduan bertan zegoen polbora mehea lehertu, sugarra kainoira pasa eta tiro egiten zuen. Denbora guzti honetan mosketariak arma bi eskuez oratu ondo destatzeko denbora zuen.

Baina mosketeko argi-mukia pizteko sua behar zen, eta horretarako beste argi-muki bat erabiltzen zuten, beti piztuta behar zuena. Mosketeak gotorlekuetan erabiltzen ziren bitartean arriskua ez zen hainbestekoa, geldi egoten zirelako. Baina gudu-zelaietara eraman zituztenean arriskua askoz handiagoa izan zen, eta istripu asko egon ziren polbora-tutuak edota kargak pizten baziren.

Mosketeen abantaila nagusia gorputzetan zein armaduretan sartzeko ahalmena zen: armadurak gudu zelaietatik desagertzen joan ziren, alperrikako zirelako. Ondorioz, mosketeek ez zuten honenbeste indarrik behar eta arintzen joan ziren.

Mosketeen pisua arinduta, XVII. mendearen erdialdean eusteko kakoak desagertu ziren, eta poliki poliki musketariek arkabuzariak ordeztu zituzten, su-ahalmena eta malgutasuna biltzen zituztela.

Errobera-giltza

Argi-mukizko mosketeek lehertzeko arrisku handia zuten. Gainera, argi-mukia beti piztuta izan behar zuten, eta erretzerakoan usain handia botatzen zuenez, ustegabeko erasoak ezinezkoak ziren; eta euria ari zenean edota umeltasuna handia zenean argi-mukia piztea ia ezinezkoa zen.

Horretarako, armaren almetxa hobetu zuten, behin kargatuta ezin zela zabaldu tiroa bota barik. Eta 1515 urtean errobera giltza asmatu zuten Alemanian, txinpartak sortzeko edozein eguraldiarekin.

Sistema honekin posible izan zen arropa azpian armak eramatea, izkutatuta. Baina ez zuen arrakasta handia izan, konplexua eta garestia zelako.

Bilakaera

XVII mende bukaeran hiru asmakizun garrantzitsuak izan ziren: suharri giltza tiroa jotzeko (argi-mukia ordezkatuz), baionetak (erasotzeko) eta kartutxoak (polbora gordina eta jaurtigaiak paperezko tutuetan biltzen).

Aldaketa guzti hauekin tiroa egiteko erritmo biziagoa lortu zen, eta arriskuak txikitu.

Suharri-mosketeei fusilak edota txispa-fusilak esaten zitzaien.

Erreferentziak

• Castra in Lusitania. y los mosquetes aún más letales. Amo del Castillo.