Carte historique et geographique d'Espagne et Portugal (eu)

Carte historique et geographique des Royaumes d'Espagne et de Portugal divisés selon leurs Royaume et Provinces
Egilea	Henri Chatelain
Urtea	1705 (edo 1719)
Hiria	Amsterdam
Tamaina	55,9 x 43,2 zm

Mapa zertan den

Henri Chatelain Parisen jaio zen, familia hugenot batean, eta abade (pastor) egin zen. Behin baino gehiagotan aldatu zuen bizitokiz: Paris, Londres (1710), Haga (1721) eta Amsterdam (1728).

Aitarekin aurretik (Zacharie Chatelain, 1723ean hila) eta semearekin gero (Zacharie junior, 1690-1754) Chatelain Frères eta Chatelain & Fils konpaniak ezarri zituen Amsterdamen, mapak argitaratzeko.

Bere mapak oso arinak dira, eta mota askotako informazioa biltzen dute: historia, geografia, etnologia, heraldika eta cosmografia. 1705-1721 epean Atlas Historikoa argitaratu zuten, zazpi tomotan. Testuak Nicholas Gueudeville, Garillon eta H.P. de Limiers jaunenak dira.

Espainia eta Portugaleko mapa hau zazpigarren tomoan agertzen da. Geografiaz gain, banaketa politikoak agerten dira, eta hainbat istorio jasotzen ditu. Honetaz gain, mapa txikiagoa dakar, aintzinako hiri eta tribuekin.

Soraluzeri buruzkoak

Soraluze Bizkaian agertzen da. Bizkaia honek Araba, Gipuzkoa, Bizkaia bera eta Kantabriako kostaldea hartzen du. Herri nagusiak Soraluze, Bilbo, Tolosa eta Orduña dira.

Mapak Espainia eta Portugaleko hiri nagusien zerrenda dakar, bertan topatzeko koordenadekin. Soraluze zerrenda honetan dago.