Igokunde Andramaria irudia (eu)
| Igokunde Andramaria | |
|---|---|
| |
| Estiloa | Barrokoa |
| Mendea | XVII |
| Kokapena | Santa Maria la Real parrokia |
| Mota | Eskultura |
Irudiak
(handitzeko, sakatu gainean)
Irudia eliz atarian
(Ángel Pirala 1906)
.png)
Azalpena eta historia
Soraluzeko gaur eguneko eliza 1530 inguruan hasi ziren eraikitzen baina, diru faltan, lanak moteltzen hasi ziren. 1606 urtean Udalak Kalagorriko aapezpikua eta Gipuzkoako korrejidorearengana jo zuen, eliza bukatu gabe eta erretaula barik zegoela. 1609 urtean Udalak aldeko ebazpena lortu zuen, elizaren patroia behartzen zuena urrengo 30 urtetan dirua jartzeko, eliza bukatzeko.
Diru iturri berriarekin, urrengo urteetan gogoz ekin zioten laneei eta, uste denez, 1630 urte inguruan erretaula berria egin zuten.
Irudi hau aurreko erretaularen erdian zegoen. Erretaula berri hau (eta irudia) Valladolideko Gregorio Fernandez-en eskolakoa omen zen[1].
Erretaula pintatzeko, berriz, José de Ganuza iruindarra deitu zuten. Herrian beste lan batzuk ere egin zituen, eta bertan geratu zen bizitzen, Etxaburueta kaleko Pintorekua etxean.
XVIII mende bukaeran, erretaula erre zen. Gaizki amatatutako kandela batek aldareko maindirea erre omen zuen, eta honen garrak erretaula hartu zuten. Konturatu zireneko, erretaula oso hondatuta geratu zen. Hala ere, irudi nagusia garretatik erauztea lortu zuten.
Gaur eguneko erretaula egin zutenean, irudi hau elizaren ate nagusiaren gainean jarri zuten. Marrazki batean agertzen da, Ángel Piralak idatzitako Detalles de Guipúzcoa. Placencia artikuluan, Euskal Erria aldizkarian agertua (1906).
Berrehun bat urte bertan egin eta gero, beltz-beltza zegoen. Eliz ataria zaharberritzerakoan irudia ere zaharberritu zuten, eta sakristian gorde zuten.
Azkenik, beheko kapera zabaldu zenean (Abadetxean dagoena) bertan jarri zuten erakusgai.
Erreferentziak
- ↑ Besteak beste, Gregorio Fernándezek Eibarko Isasi komentuko erretaula ere egin zuen, 1630 urtean.